【94歲視弱伯伯攜電筒瞻仰愛妻遺容「她還是依然漂亮」】
/圖片來源：Sonia Teo fb/
愛情對於部分人嚟講 可能係一場遊戲...明明笑住同你講會同你廝守終身但原來佢冇認真對待過你玩厭咗？就頭也不回咁搵下一個。
馬來西亞嘅陳伯伯就唔係咁諗，佢一直深愛住太太江婆婆，78年從無變心。近日孫女喺社交平台分享佢哋嘅愛情故事，並指伯伯婆婆係最美嘅愛情。
據知陳伯伯同江婆婆係一對青梅竹馬，16歲時 ，陳伯伯已經認定咗江婆婆。二次大戰結束後，佢哋正式結為夫婦。當時佢哋冇搞到鋪天蓋地嘅婚禮，亦冇奢華嘅鑽石結婚戒指，陳伯伯就只係送咗隻手鈪俾江婆婆，當做結婚禮物同定情信物，但江婆婆一直好珍惜...好珍惜...
咁多年來，佢哋依然恩愛如初。陳伯伯成日著住背心，騎電單車載江婆婆出入，佢哋人前人後都係對好恩愛嘅模範夫妻。
可惜近年江婆婆年紀老邁，身體變差，入過兩次院，出院後都要繼續瞓喺床上，當時陳伯伯日日為江婆婆煮飯。後來...江婆婆連吞嚥都有困難，最後喺家中安詳離開人世，享年93歲。
喺舉行江婆婆葬禮嗰幾日，家人都好留意陳伯伯嘅情緒。陳伯伯唔想大家擔心，故意強忍淚水同大家講冇事，佢甚至同後輩講：「外婆不在了，沒事就不要回來，因為路途很遠」
陳伯伯因為視力退化，睇唔清江婆婆遺容，於是自備電筒去見佢最後一面。陳伯伯望住江婆婆遺體講咗句：「78年來都沒有罵過她，她還是依然漂亮。」
直到送殯當日，陳伯伯咩都冇講，只係一直望住手錶，望住離唔開江婆婆張相，感覺好似唔捨得送走江婆婆。當所有儀式都結束後，家人送咗陳伯伯返屋企，諗返起陳伯伯咁堅強，全部家人都心痛到喊咗出嚟。
喺文章末段，孫女同婆婆講：「外婆，如果你有空，記得要回家看看外公。因為他很想念你，記得叫他吃飯，不要駕摩托到處跑，因為他只聽你的話！」
睇完呢個真人真事，我諗起資深演員郭鋒對亡妻歐陽佩珊嘅承諾，佢話：「我人生最大成就就係婚姻，我會一生一世愛佢」佢解釋「一生一世愛佢」同「愛佢一生一世」意義唔相同。後者即係對方離開咗，就唔再愛佢；但前者意思係，即使對方已經不在人世，佢仍然會愛佢，持續到天長地久。
#By懶醒女朋友
Search